HIDDEN DRAGON

習慣

2006-10-16T19:31:00.000-07:00

「習慣」呢樣嘢,一旦成為咗你生活嘅一部份,突然間冇咗,係好可怕嘅一種無形嘅殺傷力,會令人覺得好失落,好灰,甚至好傷心,對象不論係生物,死物,事情...等等,只要一「習慣」咗某人,某動物,某物件,某件事,某地方...等,一旦忽然間消失不見,會令人忽然間好錯愕,發晒矛...然後又突然失而復得咁出現返o係你眼前,第二次再「習慣」,就變得識得珍惜,甚至會比以前做得多咗,付出多過以前,一直開心,「習慣」落去,然後...又突然第二次再消失,冇咗一個「習慣」,令人頓時好失落,唔知做咩嘢好,唯一嘅解決方法係,再找尋另一個「習慣」(這個可能不包括人在內)。

先聲明,我寫這個,只係有感而發,並非有咩嘢大事發生响我身上。

夜王~YAOH~

2006-09-17T21:55:00.000-07:00

因為時間多又好得閑,又要清咁啲未睇嘅日劇，
只用咗兩日,就睇晒十一集嘅夜王，
劇情都OK,雖未係好睇到會勁講「好好睇呀！」
但都吸引倒我係咁"che"住連睇幾集。
起初只知道有漫畫版先,因為知道個內容係講host,
所以好感興趣租黎睇,不過已十世無去租書，
呢類漫畫呢類畫風對我黎講只會租(或借)唔會買。
由於有一排我經常流覽日劇下載區,就發現原來有日劇版，
主角係松岡昌宏,二話不說就即刻禁制download！
不過都係拖到呢兩日至睇。
我同啲friend,一直都對host呢個職業好感興趣，
有睇host漫畫,玩host game,甚至仲打趣咁講，
下次去日本要試試去吓host club見識吓。
睇咗夜王,有我想睇,想知道嘅嘢。
劇集內容係唔係真實,或有無同真正host有出入我唔知，
不過趣味性就能滿足倒我。
話明係講host,男角當然唔少,識嘅都係得主角遼介(松岡昌宏)，
佢亦做得唔錯。做no.1嘅聖也(北村一輝),
我覺得佢如果唔做演員,真係走去做host都真係得。
首先佢個外型唔錯(雖然初初睇好似有啲娘,有啲俗,不過host應該都係咁嘅打扮)
再加上有少少作狀嘅冧女笑容同表情,同埋雙電眼,果然係no.1!
最鐘意係主角遼介嘅前輩修(要潤),靚仔,高大(185cm!),
性格又好,為主角著想,冷靜,有義氣....(下刪xxx字),
論外表,我覺得修最無咁似host,可能就因為無host咁俗咁娘，
所以覺得佢最特出,有呢啲質素嘅host我都會指名佢！

繪者玩點名

2006-09-08T18:25:00.000-07:00

接京様捧，

（一）被點到名字的人在自己的ＢＬＯＧ上寫下答案，
　　　並且要再想出幾個有關畫畫的題目，
　　　將這幾個題目傳給另外六個人，
　　　還要到這六個人的ＢＬＯＧ上留言通知對方”你被點名啦！”
（二）這六個人要在自己的ＢＬＯＧ裡註明是從哪裡接到的題目，
　　　並且再想幾個題目傳給另外六個人，讓遊戲繼續下去。
　　　但是不得回傳。

看看這份問卷可以傳多遠! 這就開始囉!!
來源:つきよむ
0.你有個人作品(gallery)的網頁嗎? 可以附網址給大家欣賞一下乎?
無

1. 你畫畫的起點是什麼?
唔係好記得點開始,都係好細個嗰時

2. 你有愛用什麼工具做畫嗎? 好用嗎?
3B筆芯,HI-TEC-C,隨意塗鴉時就手到拿來有筆就用。好用

3. 畫畫上，曾經遇過或現在面對的障礙是什麼?
畫來畫去都係咁上下,好平淡,加上懶係一大障礙

4. 最喜歡崇拜的畫家或是作品，可以的話請附連結(嘿嘿~)?
太多喇...漫畫家,插畫家,同人作家.....真係太多喇

5. 做畫時有什麼特別習慣嗎?
聽歌係必然,或偶爾會開mtv出黎聽(睇)住畫,有須要其他書來參巧時,多半都會變成睇書

☆如如小王子出題：喜歡哪種類的畫作風格？(舉例？)
無固定邊類喎,合自己眼緣就OK(又唔係揀仔),有時甚至會有啲畫風估唔到自己會啱

☆某芊出題：有讓你印像深刻的漫/(動) 畫人物嗎？
聖鬥士一眾,用埋讀書時期嗰"炸"動漫人物

☆狂奔的牛出題：手繪時，最喜歡用的上色工具？
極少會上色,不過marker比較方便

☆拉茲出題：如果會電腦上色的話，上色方式是自己摸索還是有看過別人教學？在哪看到的呢？
有時會揾啲啱嘅圖出黎參巧,但係每次都學唔倒人哋嘅畫法,結果都係要自己摸索

☆亞紀嵐出題：畫人的時候從哪裡下手？
多數係面型,偶爾會由腳開始由下至上畫上去

☆縈子出題：對繪畫抱有未來的夢想嗎？有的話是？認為自己努力去做的毅力指數是幾％？
想畫嘅時候就畫,毅力指數...30%都會有卦......

☆思子出題：家人支持你畫畫嗎？若不支持你會怎麼辦？
無話支唔支持,應該係話唔會理我做乜

☆JX出題：關於畫風...有過相關的煩惱嗎?是怎樣的情形呢?
有時睇倒人哋啲畫,就會好想改成好似佢咁嘅畫風,不過都係得個諗字,無實際行動過

☆kangaroo出題：請問你繪圖比較側重的部份是什麼？如果做不好就會不對勁的那種。
如果係畫版權物,除咗畫出黎要比人一睇就認得出之外,要連個性,表情...等各樣都畫得出黎,唔係就會唔對勁。
畫自創物,都係隨心啦。

☆Mouse =*w*=出題：送朋友一張自己的圖,事後卻發現朋友因不滿圖的某些地方而擅自修改畫面?
由得佢改啦,送咗比佢就係佢嘅,不過我想講話原圖會好好多,哈哈!!始終都係自己畫完覺得無問題至送出,就算有畫錯,都係將錯就錯,改咗就唔係原裝喇(自信滿滿~)

☆奇想豆子出題：認為畫人類或非人類對你而言哪個比較好畫?
人類會比較好畫

☆魅離出題：如何尋找繪畫靈感?
打打吓機,睇睇吓書,再諗吓啲萌嘢

☆藍貓出題：畫圖的頻率多高？1個月内幾天？毎日幾小時？(包含隨筆塗鴉)
幾個月至半年不等

☆Nein出題：修羅場時最好良伴是?
聽歌,mtv,同朋友一齊畫就邊吹水邊修羅場。

☆小書出題：是否有看過喜歡的作畫風格來臨摹? (即仿畫)
一定有啦,不過以前就多啲,而家就無乜,偶爾見倒啲插圖好閃嘅就會照住黎畫,不過會將人物改掉。

☆redrobin出題：在看過你的作品/刊物後，聽過最讓你印象深刻的評語或感想是什麼？
畫真有其人嗰啲有人話「好似呀」

☆石田鳥三郎出題：在作畫的時候會常常反向思考嗎?(例如覺得用右手畫畫老是覺得不順，就會想嘗試用左脚畫之類的)←這只是舉例
畫唔倒就唔畫喇,因此我畫畫經常唔完整

☆Haoto出題：影響你繪畫生涯最大的人是誰？
堂家姐,西村しのぶ,井上雄彥,港產漫畫

☆つきよむ出題: 關於人體結構方面,有沒有推薦什麼可以參考的書籍?
無

☆京出題：覺得最難畫的是甚麼？(請最少寫一個東西出來)
唔計自己畫唔倒嗰啲,最難畫係畫唔倒心入面想嘅嘢,同埋個feel

☆孔明出題：最經常,每每一落筆是畫什麼？

點名: Ruther, 小殘, Tora

深淵

2006-09-06T19:20:00.000-07:00

間斷咁執屋執咗兩個禮拜(都仲未執完),屋企開始叫做闊落咗,整齊咗少少。執屋期間,實會揾倒,或者係發現倒一啲好耐無見,或者係被遺忘咗嘅嘢。有啲書,唔記得原來自己係買過,又有啲書同CD我收得好入搞到想睇同聽都攞唔倒。而且又有註書蟲,以前亂咁塞啲書簡直係o係度養蟲。而家買咗櫃,擺好晒啲嘢,隨時都可以攞倒出黎,解決咗我多年唔想去理嘅煩事。
之前提到執屋期間,揾倒啲好耐無見,同埋被遺忘咗嘅嘢,响我嗰堆書+CD+垃雜嘢當中,揾倒一"炸"自己好耐以前嘅塗鴉,兼且朋友畫比我嘅圖。睇返啲朋友N年前畫比我嘅圖,有啲朋友畫功同畫風比而家進步咗好多,有啲朋友就好耐都無見倒佢啲畫(唔知有無繼續在畫),有啲直頭係已經無聯絡好耐嘅朋友,睇返咁多朋友畫比我嘅圖,諗返起以前經常同朋友交流畫圖,有大家坐埋一齊塗鴉,有書信往來嘅塗鴉...而且睇返啲畫嘅內容,就諗返起以前自己同朋友當時曾經大家都好迷嘅動漫同埋game。當睇返呢啲圖,就感覺好懷念,真係由個心度笑咗出黎。o係疊塗鴉之中,有唔少以前畫過嘅外國明星,以前好鐘意畫啲外國人,因為眼窩深鼻又高輪廓五官分明特出。隔得太耐,而家應該畫唔倒,揀兩三幅比較似樣啲嘅貼落呢度當係留個念。

FOREVER GRASSHOPPER 06 CONCERT (2/9/2006)

2006-09-06T18:08:00.000-07:00

上一次演唱會好評如潮,欲加場但紅館無期。事隔十個月,終於都等倒喇！
上次我哋係睇山頂位,睇完出黎個個都話加場一定再去睇,仲要係買四百！
OK,雖然今次係買倒四百,不過係蝕卓位,即係四百尾,二百頭...
算啦,總好過連山頂位都無得睇(我哋係托人買飛,仲要好"問"至確定係有飛),
今次我哋差唔多八九成時間都係企o係位度睇,可想而知氣氛幾咁高漲，
後段嗰廿幾分鐘連串快歌,簡直係迫使人個身唔郁唔得,係咁跳,好似去咗rave party咁。
以香港歌手嘅演唱會黎講,無乜邊幾個可以做倒咁high爆嘅氣氛！
今次都係一樣,睇完出黎個個都話,如果出年再加場,再睇四百！

ALEX PETTYFER

2006-09-01T19:14:00.000-07:00

最近對男色嘅口味好似變得越來越年輕化,繼Johnny's之後,睇咗Stormbreaker,覺得個美少年版雷電主角Alex Pettyfer都幾有前途,佢如果o係無走樣情況下成長,又拍倒套對自己有代表性嘅電影,佢應該可以紅得起(起碼有我呢個姐姐支持)。片中我最鐘意嗰part,係Alex(戲中又係叫Alex)佢著住黑色西裝(奔完喪),打遍天下無敵手嘅姿態一對四個彪形大漢(印象中好似係四人),見倒個好打美少年著住西裝"呀晒鋼"咁打,响西裝誘惑下,老實講睇得我好開心。除咗同行一齊睇嘅友人,我同過其他友人講起Stormbreaker,個個都係因為想睇個美少年主角而去睇呢套戲,唔...原來個個都係動機不良...

卓面棒

2006-08-27T22:22:00.000-07:00

卓面棒

友人想睇吓我個亂desktop,就做呢個接力,不過最近屋企部腦整完機,desktop勁整齊,公司嗰部先至係亂過亂葬崗...

-OS10

-這台是你的個人電腦？還是公司或家人共用的電腦?
公司電腦

-這張桌布是什麼? 從哪裡取得的?電腦本身有嘅wallpaper,之前有用啲男星wallpaper,不過我成日都會比老細夾,費事比老細見倒我成日都用男星wallpaper咁揚,都係用返本身個wallpaper。

-更換桌布的頻率高嗎?
公司唔換喇

-桌面上有幾多個ICON?
幾十個

-一堆檔案和捷徑放得亂七八糟的桌面，你看得下去嗎?
其實之前間公司個desktop比而家仲亂(亂到wallpaper都比icon沉沒),公司機嘅話我都慣咗喇

-有沒有什麼堅持點?
亂到連自己都頂唔順我至會執個desktop

-有為了填這份接力, 還特地整理一下嗎?
絕對唔會啦

-最後請再傳給5個「我想看看他的桌面」的人。
DAMON

SOFTHARD LONG TIME NO SEE 06

2006-08-02T08:56:00.000-07:00

一向都偏向睇外國live多,本地live演唱會都極少會捧場,
今年多咗睇本地嘅演唱會,但係睇嘅全都係讀書年代嗰"炸"歌星,
繼草蜢,周慧敏之後,禽晚睇咗又係我讀書時期必聽嘅軟硬天師。
唱咗好多耳熟能詳嘅歌,毛管棟位實有幾個,觀眾都好熱烈反應。
最想講嘅係嘉賓,軟硬十場演唱會,場場嘉賓都唔同,
要入到去睇至會知邊個係今場嘉賓,好似抽獎咁。
其實我唔太喜歡一場演唱會入面會請嘉賓,
一心係黎睇個主角,請倒個啱嘅就固然好,
唔啱嘅,就好想佢快啲入返後台,咁就唔好啦。
開場前我哋都講話好彩黎明呀,古巨基呀已經出咗,
仲話如果請王菲合唱"請勿客氣"就好咯!(呢個冇可能啦)
今場嘅嘉賓係陳奕迅,佢唱住麥記歌出黎我都冇乜特別感覺,
最正嘅係,佢竟然揀咗"請勿客氣"黎唱,好"橋"!
呢個男聲版嘅"請勿客氣",陳奕迅唱得好掂喎,
佢又唔會跟足王菲版本,又有自己風格,
希望第時出live dvd時係出呢場啦!
總括黎講,Good Show!

子ぎつねヘレン

2006-07-26T08:38:00.000-07:00

初初係為咗隻狐狸仔而去睇呢部電影,
睇完後,我覺得隻狐狸仔都冇我想像中得意得令人內心吶喊,
(反而野生嗰啲狐狸仔就好得意,可能係健康活潑啲啦)
上次睇極地雪犬時,一路睇,個心就一路响度OTAKU怪叫咆哮。
今次對呢隻狐狸仔反而冇乜特別感覺,
反而最吸引我嘅係北海道鄉村嘅景,
我唔識點形容啲鄉村呀,花田呀,農地呀,鄉村學校,鄉村道路...
總之就係正啦!望倒就會個心度係咁大叫「好靚呀!」
尤其係一個斜坡落去就係一望無際嘅水平線,感覺好舒服啊~~~
我好鐘意睇啲對面冇山冇島嘅水平線,
前面乜都冇淨係得海,好神秘。
同埋好鐘意响地上行或者係坐車途中,
望向外面群山中無端端有一兩座係雪山,
真係好靚呢!北海道有咁多靚地方,
一定有比電影入面更靚嘅地方,
又係目標之一,唔知幾時至可去喇,實在太多地方想去!
講講吓,發覺自己好似唔係講緊套戲...
算啦,反正睇完出到黎我哋都對套戲都唔太滿意,都冇乜好講咯,
唯一最討好嘅,唔計隻狐狸仔,係大澤隆夫嘅女兒小林涼子是也。

濕地公園

2006-07-24T09:03:00.000-07:00

果然叫濕地公園,搞到我由頭濕到落腳(出汗啫!),
好似我呢啲汗人似乎唔係好適合夏天去戶外活動,
夏天去,就好想成日留响室內嘆冷氣,
等第時秋冬時再去多次。真嘅識郁嘅有生命嘅鳥類淨係影倒呢啲

COLDPLAY Twisted Logic Tour 2006

2006-07-14T09:46:00.000-07:00

太好睇!!!意想不到Coldplay呢場live可以好睇到咁,成場live個氣氛一路都好高漲,完全冇冷場。等咗差唔多一個鐘,一開場就比個好似十六比九咁嘅比例嘅大Video Wall所吸引,時而播吓啲graphic影象,時而影吓Coldplay各成員演出時嘅落力情形,通常外國live嘅舞台設計簡簡單單,但又會令人印象特別深刻眼前一亮。當唱到第一個毛管棟位Yellow時,中途放出十幾個黃色大汽球,响觀眾堆度推黎推去,實在太意想不到,全場都high到震!The Scientist係第二個毛管棟位,實在太好聽!一路聽,一路跟住唱,手臂就係咁起晒雞皮毛都棟直晒!唱完首Kingdom Come之後,就唱風格有點相似,不過就係翻唱Johnny Cash嘅Ring Of Fire,Chris仲有點扮Johnny Cash嘅唱腔(不過唱得依然係好Coldplay)。仲有一個更加令人驚喜嘅就係,Coldplay嘅態度好Nice呢!主音Chris Martin出奇地多嘢講,成日都會對住台下觀眾講嘢,成日都問台下觀眾場show OK? So far OK? 唱歌時又好落力,邊唱邊四圍走,彈琴都彈得型過人。當然佢都有做啲將一兩句歌詞改成"Hong Kong"咁嘅事啦! 好記得有一part,佢唱完佢主唱嘅部份,其他成員就繼續彈佢哋嘅樂器,首歌都未彈完,佢就開始講嘢喇!啲音樂都即刻停晒,真係好Nice呢!完全冇擺出一幅一哥band架子,親民到爆!印象分已經加晒分!而全場最最最令人驚喜嘅就係,Chris佢竟然走落台,跑向後面觀眾席前唱歌,嘩!嗰區嘅觀眾無啦啦發達!好羨慕~
睇完後,同Damon出黎大講場live,大家都覺得估唔到咁好睇,仲覺得今年睇過嘅live,同Franz Ferdinand一樣咁好睇!不過返屋企途中遇上令人激到噴火嘅事,簡直係嗰晚嘅污點。

18/9/05 ~8/10/05 歐洲三國遊前言

2006-07-12T08:15:00.000-07:00

襯而家記憶仲係好新鮮,
我決定將我舊年去歐洲三國旅遊嘅事記錄喺Blog度,
比自己平時或日後可以回味。
過往去完旅行,遊記只會寫到兩三日就會好懶唔會再寫落去,
淨係係咁易記低去過嘅地方,而家有咗Blog,就有乜都記晒落去。
今次係我第三次辭職唔撈乜都唔理就走去旅行,
我嘅工作,去到出發前一星期為止。
換言之,出發前我有一個禮拜時間準備。
記得出發前幾日,上網msn見倒個friend,
呢個friend係以前公司嘅客,因為大家有個共同嗜好而投契,
至今依然有msn,電話聯絡。
嗰日我問佢,其實我成日咁樣辭工乜都唔理就走去旅行,
玩完返黎至算,咁樣係咪好敗家,好冇責任感?
佢就講咗一大堆自己喜歡就好,只要自己開心,
及時行樂之類嘅說話,仲舉例埋自己親戚錢多冇命享之類,
我呢個friend佢係講真心話又好,安慰說話又好,
對我黎講都係好好嘅support,佢仲話,咁樣先似係我嘅性格,
好!多謝你鼓勵!
我個人一向都好臨急抱佛腳,即使我有一個禮拜時間,
我點都係到我上機嗰日至肯郁去執行李,屋企人都頂我唔順!

CONGRATULATIONS!!! ITALY~~~

2006-07-09T22:07:00.000-07:00

呢排好開心,因為意大利捧咗今屆世界盃！
自九四世界盃,意大利對尼日利亞嗰一場十六強比賽開始，
我就開始支持意大利,嗰一屆實在令人難忘，
我可以好肯定咁講暫時睇過幾屆嘅世界盃，
九四嗰屆係我最喜歡嘅一屆。
即使而家啲球員好多都唔認識(經過今次世界盃都開始識晒佢哋喇!),
直至而家我都係支持意大利,相信永遠都係,
連首國歌都聽到好熟(當然係唔會識得唱啦～)。
九四嗰屆意大利好遺憾未能夠捧倒盃，
今屆好開心終於能親眼睇倒(電視)意大利捧盃,真係好感動！
逢親要加時十二碼決勝負我都特別緊張，
邊隊都好,要十二碼決勝負對輸嗰方係極度之唔抵，
尢其係你最捧嗰隊,意大利今次對法國決賽又係要十二碼決勝負，
意大利有不利嘅紀錄 ﹣過往三次十二碼都輸，
唔單只球員有心理壓力,作為球迷嘅我哋都有心理陰影，
雖然對今屆嘅意大利奪盃好有信心,但十二碼唔係話踢得好就等如贏，
再加上親眼目睹過(電視)兩次十二碼輸比人,心理陰影真係好大，
好彩意大利今屆打破倒輸十二碼嘅宿命,仲報倒九八世界盃八強戰之仇，
打倒法國,仲十二碼全部入晒,見倒班意大利球員興奮得周圍跑嗰刻，
真係非常之感動,毛管都當堂棟直晒！好喜歡今屆意大利球員陣容。
不過若論緊張程度,還是不及九四世界盃決賽加時十二碼分勝負，
睇得好心痛！

MAURICE

2006-06-27T00:11:00.000-07:00

早前終於都睇咗小殘所講嘅Maurice,多得小殘帶VCD來。
嗰朝早我臉都未洗,就幾個圍埋電視前睇Maurice，
一如小殘所講啦,套戲真係幾好睇，
又sweet,好溫馨,也很感動,亦都好萌。
以前不嬲都唔太喜歡Hugh Grant,再加上佢嘅日落大道代表作。
係睇咗About A Boy至對Hugh Grant改觀(好大原因係因為角色討好),
Maurice入面嘅Hugh Grant,若按照套戲嘅上映年份計算,
又再求其計埋拍攝時間,當時嘅Hugh Grant大概係廿五至廿七歲,好嫩口!
Hugh Grant飾演嘅Clive Durham係劍橋大學嘅學生，
外表文質彬彬,大家閨秀型(?)嘅少爺仔，
佢果啲含情脈脈樣,同主角Maurice眉來眼去嘅眼神，
真係教我如何不萌他囉！(只限於Clive呢個角色）
Maurice嘅另一個情人Scudder都唔錯oY!
同Clive係兩種類型,階層都完全唔同,又對Maurice一往情深,
Maurice真係好眼光囉!(係casting識揀咋嘩!)

茉莉花開

2006-06-24T06:45:00.000-07:00

GOOD film!
三代嘅女兒全由章子怡飾演,而三代嘅母親及外婆全由陳沖包辦,
同一演員,橫跨三代,
三代嘅名字分別為"茉","莉","花",安排都幾特別,
對手戲最多嘅固然係呢兩母女,兩個都做得好好,
我一向都比較鐘意章子怡做一啲樸素平凡嘅女子角色,
就好似"我的父親母親"入面樸素山區鄉下少女,
而"茉莉花開"入面,三十年代曾經做過明星嘅"茉",
六十年代性格剛烈嘅"莉",八十年代堅強獨立嘅"花",
三代唔同性格嘅女人,章子怡做得比之前嘅更加好；
同樣,三代嘅陳沖都做得唔錯,一見倒陳沖,
就第一時間諗起婉容皇后,歲月催人,
中年嘅陳沖,竟有啲似劉曉慶。
好鐘意戲中三十年代舊上海時代背景,
旗袍、舊街、老商店、舞廳、人力車...
果然古代,舊年代嘅吸引力係好大嘅。

最怕之最

2006-06-09T11:15:00.000-07:00

Cham大點到而接棒。

寫出填寫日期: 2006年6月10日 1:14am
最怕的性格: 小氣,臭脾氣,自私
最怕的男人: 臭男人(男人[尢其麻甩佬]真係體臭特別勁啲個喎)
最怕的女人: 賤女人(諗唔倒呀,相對返啦)[無雙?!]
最怕男人做的動作: 一路行一路噴煙,or一路等巴士一路噴煙嗰啲(硬係啲麻甩佬特別鐘意邊走邊吸個喎)
最怕女人做的動作: 嗲聲嗲氣(friend除外),簡直令人毛骨悚然
最怕的動物: 突然間彈出黎嗰D貌似水曱甴嘅蛀書蟲,其實唔係怕啲蟲,而係怕執嘢嗰陣突然彈出黎嗰一嘢,同埋我啲書呀...
最怕的死物: 學阿京樣話齋,電腦!虧起上黎,電腦係我嘅敵人

做完後找7個人接棒：七個小矮人

HUMAN TRAFFICKING

2006-06-05T10:12:00.000-07:00

初初睇倒Human Trafficking電視宣傳片時,就被佢嘅題材吸引,內容係講人口販賣,最初以為係記錄片,因為段宣傅片剪輯得實在唔似係電視劇,係要到睇嗰陣至知。睇晒全四集嘅Human Trafficking,雖然有少許情節會令人覺得唔知點解會咁樣,但係個內容係我好感興趣嘅,而且有啲情節都拍得頗緊張,好係令人要個個禮拜去追嗰隻。由於全劇只得四集,感覺都幾似係睇緊電影,可能一集魔戒DVD加長版會仲長過四集Human Trafficking。劇中最搶戲嘅,係飾演極惡人口販賣頭子Robert Carlyle,睇Robert Carlyle嘅戲好少,最深刻一定係The Full Monty。連我妹都話「呢個人細細粒,又做得倒大佬Feel喎!」。我,我家姐同妹都有追Human Trafficking,我另一個家姐話太慘唔想睇,仲話我哋內容咁殘忍,咁都話好睇,人就係咁架啦,係鐘意睇呢啲敏感題材呀,恐怖核突嘢,唔係點會有咁多"今日睇真啲","殘酷食人族","黑太陽七三一"...之類呢啲節目。因為我妹話要睇粵語配音唔追字幕,又為咗方便同我個妹講劇情,我稱呼主角Mira Sorvino為女幹探,而女幹探個上司Donald Sutherland,我哋叫佢做譚炳文,因為係譚炳文配音。唔知有冇聽錯,我仲聽倒以前同冰河配音嗰個配音員一人分飾幾角,配啲扯皮條,契弟,嫖客,之前又好似聽過佢配啲記錄片旁白,唔知係咪又返返黎配音。

藍宇的第二次機會

2006-05-28T18:31:00.000-07:00

由於錯過咗响戲院睇藍宇,之後出咗VCD就買返黎睇,記得第一次開隻碟睇嘅時候,屋企人都在場,不過睇嘅都係得我一個,而且仲受盡干擾,搞到我不能專心睇套戲,故事內容睇唔真之餘,連帶仲覺得套戲麻麻。最近因為斷背山大熱,我家姐响機上睇咗,不過可能無字幕關係,我家姐話悶悶哋,但就竟然對呢種同志電影有興趣(雖則佢依然係會厭惡同性戀,但又想睇),仲問我有無咩同志電影好睇,唔知點解,我第一聯想嘅就係藍宇,縱使我對藍宇印象並唔深刻。禽日咁啱我家姐去我屋企,無所事事,就叫我開隻藍宇出黎睇,當然我有事先講明套戲係會有裸露情節。距離第一次睇藍宇都隔咗好耐好耐好耐...而家第二次睇返,發覺我上次睇嗰陣真係受到好大干擾,好多情節我都係無乜印象,我諗我淨係記得個開頭同個結尾。我今次睇返,原來藍宇係幾好睇個噃！故事唔係曲折嗰種,但又拍得實在又幾好feel,胡軍同劉燁又做得好好(記得劉燁憑住藍宇得倒金馬獎,如果可以雙雙奪獎就好喇),各自做得好,互動又能擦出火花。今次第二次睇卒之都無人干擾可以好專心咁睇,而我家姐就睇睇吓仲瞓著咗,跟住都依然話同性戀好核突,但又要睇。

野ブタ。をプロデュース

2006-05-16T23:42:00.000-07:00

修二と彰,or修二x彰!^^草野彰かわいい〜

翡冷翠

2006-05-11T08:03:00.000-07:00

今集嘅"向世界出發"係講意大利嘅佛羅倫斯,片中所及嘅地方我大部份都有去過,睇嗰陣時好有親切感,尤其係喺米高安哲羅廣場上表演嘅Jazz樂隊,我當時都有偷拍佢地(偷拍已變咗明拍,被佢哋發現咗,不過佢哋出得黎表演嘅都慣咗比人影相),如今喺電視上又見倒,當堂好興奮咁同我妹講「我見過呢幾個人呀!」「我嗰陣影咗佢哋相呀!」想必呢隊樂隊經常喺米高安哲羅廣場表演。當時同我一齊旅行嘅家姐都即時打電話比我,一齊講佛羅倫斯。記返起當時去米高安哲羅廣場,係我堅持一定要去,即使一路喘氣行上去(廣場係喺小山丘上),我家姐一路埋怨我安排失當,去唔倒比薩斜塔,我都堅持要去米高安哲羅廣場,"虎陷"佛羅倫斯市。意大利行我只去咗幾個城市,呢幾個城市我都好鐘意,尤其係佛羅倫斯,我對佛羅倫斯好有感覺,希望將來有機會可以重臨佛羅倫斯。下集預告胡杏兒食嘅牛肚包我都有試過,牛肚好食,淨係牛肚會好食啲,夾面包冇咁match。我記得我嗰時買牛肚包,叫埋咖啡,收錢嘅老闆娘問我係咪食牛肚包,我話係,老闆娘就叫我唔好飲咖啡,飲可樂啦!好,你話點就點啦!

狗

2006-05-10T04:54:00.000-07:00

好耐以前,屋企養過三次狗,三隻狗分別養嘅期間都好短,由兩個禮拜至到三個月,三隻狗都係人哋送嘅,送黎嘅時候都係已經大定咗。我而家返工嗰頭,附近嘅車房,有啲有養雜種唐狗,周圍成日都會見倒啲唐狗行來行去。幾個月之前,附近車房無端端多咗隻細嘅黑白色唐狗,隻唐狗仔成日都跟住隻成年嘅啡色唐狗。啲動物無論係咩嘢品種,好多時小時候都好可愛,呢隻黑白唐狗都唔例外,我有時返工食晏放工見倒佢時都會係咁望住佢,撩下佢。幾個月後嘅而家,呢隻黑白唐狗已經長大。我係第一次睇住一隻狗成長,由好細隻到成型嘅過程,對呢隻黑白唐狗都留有少少感情,每行經佢身邊都一定會望佢,即使佢而家白色毛部份已變咗灰tone。

萌

2006-05-09T01:24:00.000-07:00

好耐好耐好耐都無畫過圖,甚至响張廢紙上亂畫都無,今日响公司無所事事,老細又出咗去,就"了"咗呢幅zoro x sanji學生圖(制服誘惑),一路都好萌zoro x sanji,睇就睇得多,畫就無乜幾何,zoro x sanji絕對係睇人哋啲同人萌過自己畫。下次再响度再貼啲其他萌圖～（開始變萌BLog?!)

塊魂AGAIN

2006-05-07T04:39:00.000-07:00

禽晚食咗月森蓮白果,已經係零晨三點幾,
第日唔駛返工,又想玩到四點至瞓,
得半粒鐘就開返好耐冇玩嘅塊魂出黎玩,
一玩又碌多兩隻塊魂仔返黎,可愛E~~~~~~

眼前一亮~

2006-05-02T22:36:00.000-07:00

前幾日晚响屋企講緊電話,講講吓途中,被電視播緊嘅節目吸引咗我注意力,播緊嘅係亞視晚間新聞,報導內容我都唔清楚因為講緊電話,吸引我嘅,係被訪問嗰個人,係一個著住西裝,操流利過河國榮嘅廣東話,文質彬彬嘅外國男人,仲要係後生又靚仔嗰隻！我一見倒就即刻「嘩!!!」咗出黎,都唔理電話入面講緊嘅家姐,即刻叫我個妹快啲望住電視,有靚仔呀！睇倒下低註明被訪者嘅身份,原來該名外藉靚仔係一名教師,嘩!!!我有咁靚仔嘅老師,我淨係望住佢都唔駛聽書咯！（雖然讀書時期本身就唔係點聽書)個外藉老師嘅樣貌，靚仔嘅程度同Orlando Bloom咁上下，我絕對冇誇大,連我個妹唔好鬼嘅都話個外藉老師靚仔。平時靚仔好難至會見倒,而家比我見倒嘅仲係星級,好難得！

東平洲一日遊

2006-05-02T07:03:00.000-07:00

四月三十日,同友人及同事一家去咗東平洲一日遊,本來係參加咗旅行社嘅一日遊鴨仔團,但出發前一日,友人話旅行社通知佢個團唔夠人,成唔倒團,當時有一刻係好掃興,本應嗰日係去郊遊嘅忽然間咁就冇咗,友人話不如照去啦!自己坐船去,我諗都唔駛諗就答應,因為個心情已經係諗住去硬,唔可以沒殺咗,今次唔去,都唔知幾時先肯郁,而我同事都一樣,於是乎大家一行六人,就照舊出發去東平洲。
東平洲,係香港最東嘅一個離島,要去馬料水碼頭搭船去,船程個半鐘,接近大陸,電話都接收唔倒,當地村民睇嘅都係大陸電視台,感覺好似去咗大陸旅行,再加上東平洲最出名嘅頁巖實在係好特別,我哋仲話影啲相比人睇話去咗外地旅遊都呃得吓人。
其實東平洲唔大,行勻成個島,大約兩三個鐘都應該行得晒,但我哋沿途唔係飛石,就係踎喺地度睇啲生物,植物,搞到都行咗差唔多四五個鐘。前半路程我哋都係跟全條山路咁行,直至行到去"斬頸洲",我哋改為沿海而行,行嘅都係一層一層嘅頁巖,啲頁巖感覺好似好多層嘅酥,好靚!
今次冇跟鴨仔團都係好嘅,因為可以行勻成個東平洲,又可以慢慢行,慢慢玩,仲可以喪飛石,不過我今次玩到條褲爆軚,爆到史無前例咁大,涼浸浸,但就好唔方便。對於今次東平洲一日遊覺得好滿足!好彩第二日係五一唔駛返工,我已經成個人謝晒喇!尢其係隻右手。

娃聚

2006-04-20T08:17:00.000-07:00

四月十六日,上星期日我哋搞咗闊別咗好耐嘅娃聚,好開心!見倒啲公仔可以著倒好多唔同嘅衫鞋,好靚!You嘅Haru變咗女裝好漂亮,遠夜西裝骨骨直頭靚仔啦!Nell個仔換走咗厚底visual鞋,著返啱個仔style嘅衫可愛咗好多!仲有唯一嘅女仔橘純,全部都好靚~~~遲來嘅Cham帶咗"掃生"同"喇生"黎,喇生係新仔,嗰日第一次見倒,個樣有啲似Hyde,唔唔!!喇生註定比我設定係受架喇!唔影返幅BL相就枉我係腐女喇!斷背斷背!!!
希望下次再搞過娃聚,好好玩,玩公仔之餘大家吹水又開心~

愛‧糖針

2006-04-19T22:32:00.000-07:00

今年香港電影節我只揀咗三套電影,因為有好多想睇嘅電影都冇中文字幕,而睇咗嘅三套戲之中,最好睇嘅係澳洲電影"CANDY"(愛‧糖針),"CANDY",係片中女主角嘅名字,成套戲主要係圍繞住女主角Candy同男主角Dan嘅沉淪毒海糜爛生活,其實成套戲故事都算係簡單,但有某些情節卻令人印象深刻,戲中Candy到後期開始精神崩潰,响佢同Dan新搬入去嘅新屋,整間屋嘅牆上寫滿晒佢同Dan由以前初相識開始嘅事,而當Dan外出返家時見倒成間屋牆上寫滿字,又凌亂不堪,嗰下我仲以為下一步,Dan會响屋內發現Candy自殺條屍,呢一幕真係有啲扣人心弦...
男女主角都演得非常之好,飾演Candy嘅係我第一次接觸嘅名字,澳洲演員Abbie Cornish,年青貌美,又有演技,比同鄉嘅前輩Nicole Kidman更勝十倍！(唔好意思,我本身唔太喜歡Nicole Kidman)而飾演Dan嘅係Heath Ledger,我覺得佢演呢套戲比起Brokeback Mountain更加出色！而且佢响套戲入面都幾型仔～仲有穿插响Candy同Dan之間,有點似佢哋爸爸嘅好友Casper,由Geoffrey Rush飾演,最近幾年,Geoffrey Rush好多時都飾演呢類輔助又主要嘅角色,最近期有Munich。順帶一題,套戲嘅配樂唔錯,幾有feel!

墨子攻略

2006-04-10T07:28:00.000-07:00

因為張之亮拍緊「墨攻」,劉德華飾演主角「革離」,
因此最近响漫畫舖見倒出版社出返「墨子攻略」文庫版,
呢套書,我幾年前睇過,我覺得係非常之值得推介人去睇,
以睇過嘅歷史漫畫黎講,我覺得墨子攻略係最好睇嘅,
墨子攻略,日本漫畫原著森秀樹,畫風寫實仔細,
好切合呢類歷史題材。
內容講述戰國時代墨家嘅「兼愛非攻」思想,會幫助城邦避開戰爭,
而呢次,趙國派出萬人大軍及精兵良將去攻打小國梁城,
於是墨家派來革離黎拯救處於水深火熱之中嘅的梁城百姓。
本書好睇在革離佢用咩方法以梁城呢d易攻嘅小城,
可以對抗趙國嘅萬人大兵,而且因為時為戰國時代,
兵器,設備...都比較簡陋,革離就運用佢嘅智慧,
連同所率領嘅梁城民兵一齊對抗趙國。
作者描寫戰爭打鬥場面非常緊湊,
好多埋牙戰(?!呢個字有啲問題...b),
當時我睇嗰陣係咁"che"住睇,借唔倒落去就即刻走去租,
原來租書個老闆娘都啱墨子攻略,真係"英雄所見略同"。

戦国無双２バトン

2006-04-09T06:59:00.000-07:00

得到京樣指名嘅戦国無双２バトン～

○一番最初にクリアしたキャラは？
（またそのキャラをなぜ最初にクリアしたか？）

お市。
因為要出長政哥!

○自分が武将だったらどの武将に仕えたいですか？

直江大人!可以睇倒直江同三成恩愛,直江family天倫之樂~

○よく使うキャラは誰ですか？

直江大人!

○あまり使わないキャラは誰ですか？

未用過嗰"炸"

○敵武将になった時に一番嫌なキャラは誰ですか？

風魔啦,睇見佢就煩

○好きなステージはどこですか？

冇特定

○一番お気に入りのムービーは？

凡係有關直江家嘅,尢其係一家三口嗰個,同埋直江心如止水嗰個,
以及切腹殉情嗰個。

○恋人にしたい武将は？

直江大人,長政哥,三成女王

○お友達になりたい武将は？

幸村仔仔

○好きなコンビは誰と誰？

直江family!!! or 直江三成二人世界~~~

○プレイしていて熱いと思うところは？

○プレイしていてイライラするところは？

○思わず笑ってしまった台詞は？

○無限城で一番進めたキャラは？

未開始玩無限城

○猛将伝、出るとしたらキャラ化希望の武将は？

真田信之

○このバトンを回す人５人

Josh Hartnett,Kuchiki Byakuya,Natalie Portman,Gemma Ward,
Arakawa Hiromu

SIGUS ROS LIVE IN HONG KONG @ HITEC

2006-04-08T01:36:00.000-07:00

一直都覺得想睇Sigur Rós嘅live嘅話,就一定要飛去外國老遠去睇,
唔係就咪駛旨意,點知就响個幾兩個月前,友人Damon收倒風話Sigur Rós會黎,
真係令人意想不到,嗰吓第一時間就諗估唔到Sigur Rós都會黎香港!
之後證實咗真係confirm咗會黎開concert,即刻唔駛考慮,
就算冇錢點撲水都一定要買飛去睇!
終於,四月七日,禽晚卒之都可以睇倒一直都恨睇嘅Sigur Rós live喇!
因為Sigur Rós嘅音樂並唔係嗰啲可以令人又UN又跳,
萬人大合唱(都冇可能可以唱倒囉)嗰類風格,
所以都預咗會係乖乖哋坐响位度欣賞,不過送走咗supporting act之後,
啲樂迷開始有少少郁動,一向鐘意衝上前睇嘅我哋當然都一馬當先拿起袋就向前衝,
我哋衝咗前去貴價飛嘅area,搵倒唔會比人擋嘅位置欣賞Sigur Rós嘅live,
非常鐘意佢個舞台,其實係好簡單,只係有塊又大又透透哋嘅布廉擺响最前面擋住,
當Sigur Rós出場時,就見倒佢哋嘅剪影,再加上打燈效果,以及佢哋音樂嘅節奏,
襯埋嘅效果非常之好,畫面又好靚!就咁簡簡單單就已經搞到咁正,真係好得!
Ágætis Byrjun真係Sigur Rós最正嘅大碟,佢哋每演繹Ágætis Byrjun入面歌時,
樂迷嘅反應係最大,尢其當佢哋演繹我非常喜歡嘅一首歌Viðrar vel til loftárása,
燈光亦配合埋首歌樂器出現嘅先後次序黎打燈,當主音完成唱歌嘅部份,
跟住就到首歌嘅後半部澎湃嘅純音樂部份,美中不足嘅係,本來呢首歌嘅長度係十分幾鐘,
可能濃縮咗成七八分鐘,後半部嘅純音樂部份縮短咗,如果可以玩晒成首歌就好perfect!
主音把聲本來响碟度聽已係好飄渺嗰種,現場唱都唱到好似錄音咁,
唱高音完全冇難度,佢把聲真係好動聽,全場都聽到我毛管棟!
呢場live,我哋睇完出黎個個都話好正,好滿足!
十分滿分嘅話,比晒佢爆燈啦!!!

ACCIDENT

2006-03-14T05:14:00.000-08:00

今朝返工,响馬路度行行吓,
突然比某啲嘢撞到跌落地下,我「嘩」咗一聲應聲倒地,
心諗邊Q個行路唔帶眼又咁大份撞到人跌底,
又撞到我右邊面痛,慢慢起身,原來撞倒我嘅係架van仔,
係架van仔個倒後鏡撞倒我右邊面,我都當堂嚇咗一嚇,
冇諗過會比車撞,好彩嗰度係轉入啲屋邨泊車位,
車速好慢,唔係我第日就會見報喇...
其實我諗應該係我唔啱,因為我係一路聽mp3一路行嘅,
完全隔絕晒外來嘅聲音,平時我時不時都會比車砵,
好耐以前都試過差啲比巴士撞,只係相差三四個身位,
再加上朝早返工,通常都未訓醒,朝早我有時會自自然合夾咗眼黎行都唔知,
今次係完全唔知有架van仔駛緊入黎,不過雖然我話係我嘅過失,
但個van仔司機都冇落車睇下我有冇事,
就算你落車睇下我有冇受傷之後再鬧我都好oY!
我覺得個司機好冇良心,好冇責任心,
撞倒我塊面咁痛,我即刻攞塊鏡出黎睇下有冇損傷,
右邊面即刻好似鍾無艷咁紅咗一邊,眉頭位置仲腫咗起咗粒細瘤,
只係輕微碰撞,又冇人理,咁我繼續行去搭車返工啦...真係黑...

咁大個人第一次去大嶼山

2006-03-13T07:31:00.000-08:00

前日(三月十二日)去咗大嶼山半日遊,
同行嘅有亞禮,小虎,同埋小虎嘅friendぽんさん(唔知係咪咁寫,當住係先)
失禮!我咁大個人,都係第一次去大嶼山(唔計搭車去機場嘅話)
之前我去博覽館做展覽,搭老細車去時,見倒藍色的士,
即刻好大反應咁叫「藍色的士呀!我第一次見咋!隻色好得意好似玩具車呀~」
(平時我係一上車就訓,冇見過大嶼山的士)
即時响同事老細面前出洋相,佢哋仲笑我「你係咪香港人黎架?」
我今次卒之都去咗大嶼山,好開心!
倒塔咁早就起身去東涌地鐵站會合友人,非常之有旅行feel!
首先去咗睇大佛,跟住就去我一直都好想去嘅大澳,
全程由亞禮做嚮導,原來亞禮係大嶼山長大,所以非常熟悉大嶼山!
大澳,真係一個好奇特嘅地方,去到感覺好似去咗外地旅行,一D都唔香港,
小小嘅水鄉令我想起威尼斯嘅縮小平民版,嗰D搭响水度嘅棚屋好有特色,好靚呀!
我哋入村穿過小橋,走過小路,有D民宅冇關門,好鐘意"裝"入去人哋屋企,
睇下佢哋屋企係點,實在令我目不暇給,好喜歡大澳呢個地方!好有外地旅遊Feel~
我哋仲坐觀光船遊覽大澳風景,仲駛出海睇中華白海豚,嗰日好好彩,
真係睇倒海豚!雖然只係睇倒海豚游上水面嘅背部,但每一次見倒海豚游上水面,
我哋都會好興奮咁叫咗出黎,又大嗌「睇倒喇睇倒喇」「嗰邊呀」之類嘅說話,
咁樣已令人覺得好滿足,好開心!
好鐘意大澳,而且同大家都玩得好開心好盡興,希望第時再有機會重臨大澳。

FRIENDSHIP FOREVER

2006-03-11T05:56:00.000-08:00

三月十日,約咗Damon去睇Walk The Line(弦途有你),
套戲幾好睇!不過全套戲嘅最大吸引力,
我覺得係男女主角嘅演技,佢哋真係演得非常之好,
佢哋個別演得好之餘,互動都擦出火花,
而且唱功好得,佢哋不愧係分別攞倒金球獎同奧斯卡影帝影后,
開場前我同Damon去食飯,談話間,
我講起我之前响Blog度數返自己睇過咩嘢live,
而睇返D concert飛,先記得第一次响香港睇Suede嘅live係九七年,
亦即係嗰場live度結識咗Damon同Ginnie,
原來大家已識咗九年!真係估唔到原來已經有咁耐,
講講吓,Damon醒起嗰場live嘅日子係九七年三月十日,
「呀!咪即係今日?!」咁啱我哋就約埋一齊去睇同音樂有關嘅電影,
我哋都係因為音樂而結識,一路Keep到而家,
大家嘅喜好差唔多,除咗音樂,仲鐘意睇戲,
我哋一齊睇戲嘅次數,肯定超過一百次以上!
好難得有音樂同電影嘅朋友(我有個朋友都話音樂朋友難求),
仲有之後認識嘅Irene同Roni,
我哋仲諗緊,出年點慶祝相識十周年!
Cheers~~~Damon,Ginnie~~~

SIGUS ROS LIVE IN HONG KONG

2006-03-07T02:57:00.000-08:00

實在估唔到,Sigus Ros會黎香港開concert!!!
好興奮!!!Live一浪接一浪,
已經買定飛等你喇Sigus Ros!!!
真係十萬個出乎意料嘅驚喜呀~~~~~

純粹廢嗡

2006-03-07T02:32:00.000-08:00

近呢幾年,我每年都會睇奧斯卡,以前份工比較自由,
我甚至係唔返工睇奧斯卡直播,而家轉咗工,只好睇夜晚重播,
直播奧斯卡嗰朝早,我如常返工,間唔中上網check吓賽果,
友人msn問我:"乜你唔係請緊假睇奧斯卡嘅咩?!"
哈哈!!真係知我者莫若你喇~~~
其實,我咁喜歡睇奧斯卡,只有一個動機,就係睇星!
賽果點樣我無乜所謂,反正啲戲梗有佢贏嘅道理,
我最鐘意睇外國明星,男女演員老中青乜都鐘意睇,
頒獎前嘅紅地毯都一樣好睇!
而家電視台都已經唔播金球獎,格林美之類嘅節目,
實在極少機會可以睇星...
我經常性同我個妹講,如果香港有出版社出淨係講外國娛樂嘅八婆雜誌就好咯!
佢就話如果有就淨係我先至會買,我又成日抱怨有線既然整咗個娛樂台,
就好心整個節目淨係講外娛啦!我妹就叫我同有線投訴,
我個妹成日話我outdate,又唔八卦,其實如果係外娛嘅話我就會八卦!

續．邂逅問卷

2006-02-17T07:08:00.000-08:00

跟住到Ruther嘅,同"邂逅問卷"啲問題有啲唔同,要分開黎答...

Ｑ：這份問卷是誰傳給你的啊？
Ruther

Ｑ：跟這個人是在什麼情況下認識的？
以前有陣子對同人嘅熱愛度爆晒燈(雖然而家都不枉多讓),
能力以內嘅話都會想盡辦法去得到我想要嘅同人,
而Ruther,就係當中嘅一個對象,就係咁就結下咗不解之緣喇!

Ｑ：認識多久了？
應該都兩年以上咯

Ｑ：這個人有別於一般人的特點嗎？
應該都幾有自信
另外,我講啲好核突好賤嘅嘢,佢似乎唔介意,而且仲會覺得好笑,
令到我可以唔駛保留,肆無忌憚咁暢所欲言,乜都講得

Ｑ：在你心目中這個人是怎樣的人？
同人度應該都有一百巴仙,工口度...應該都係一百巴仙,
啱晒channel啦~

Ｑ：現在有想認識誰嗎？請點名
冇呀...隨緣啦

Ｑ：請傳給六個朋友
淺井長政,Brad Pitt,Orlando Bloom,
Buzz lightyear,Leon S.Kennedy,Vincent Gallo

邂逅問卷

2006-02-17T06:29:00.000-08:00

積咗三個人先至黎答呢個問卷...

收到了A.京, B.小殘的「邂逅問卷」：

1. 這個問卷是誰給你的？
A. 京
B. 小殘

2. 是在什麼樣的情況下認識的？
A. 己經係咸豐年代讀書時期嘅事喇,嗰陣仲興書信交筆友,
响"漫畫周刊"啲筆友欄度識嘅,係我先寫信比佢,
諗返起以前人手寫信好好玩,成日都會望啲信快啲寄到黎,
由於大家住得近,又會約埋一齊出黎玩,久而久之,就成為咗朋友
B. 透過"夢雜錦"而認識,除咗動漫同人,大家又鐘意睇戲,聽歌...
有時又會約埋一齊睇戲睇concert,有function搞有時會預埋我份,好好玩!

3. 大概認識多久時間了？
A. 由讀書到而家,都好耐喇...可能有十年以上
B. 雖然冇A咁耐,但都起碼五年以上,應該...

4. 有見過面嗎？
A. 見過好多次啦,大家已經係朋友,動漫友,同人友,機友,崔智友,張學友,驢友...
B. 同上

5. 現在有想要認識的人嗎？請寫出來。
隨緣啦

6. 請傳給五個人。
京,小殘,Nell,P,YOU (其實係已經答過晒)

同人女100問

2006-02-08T22:43:00.000-08:00

非同人人仕勿看,自重!!!

01.首先請先自我介紹,HN(筆名)
孔明
02.HN的由來是?
三國孔明
03.請寫出生日跟星座
亞魯迪巴
04.年份...也就是年齡囉....
スネーク 
05.還有血型呢?
不明
06.住在哪裡?
家途四壁...
07.用一句話來說明你的性格的話?
衰格
08.座右銘是?
冇
09.最近很喜歡的食物是?
冇特定
10.喜歡哪種飲料?
永遠係可口可樂,還有茶和咖啡
11.最常做的休閒活動是?
上網,打機,看書...
12.最常看的電視節目是?
外國娛樂音樂電影報導
13.喜歡的作家跟漫畫家?
太多
14.喜歡的藝人?(國家不拘)
也太多
15.出門時一定會帶著走的東西是?
ipod mini
16.你的同人歷史有多久?
都好幾年
17.踏入這個世界的因緣是?
認識咗有玩同人嘅朋友
18.請簡單列出目前為止喜歡過的種類作品以及其中最喜歡的角色,CP的經歷
很多,會有排打...
19.你是容易浮氣(變心)的類型嗎?
應該係越來越多喜歡嘅
20.喜歡的CP(配對)傾向?(ex:兄弟,師生....)
冇特定
21.相反的,無法接受的CP傾向?
細路受,肌肉受,大叔受
22.喜歡的攻君類型是?
強攻,成熟型...
23.討厭的攻君類型是?
似受多過似攻
24.喜歡的受君類型是?
強受,女王受,口是心非型...
25.討厭的受君類型是?
細路受,似女人
26.對總攻,總受有什麼想法?
總攻,總受都係因應個人喜好而定
27.你是喜歡攻君多還是受君多?
攻君較多
28.如果以攻與受比喻的話,你覺得自己是哪一種呢?
總受
29.你對你支持的CP,是容易被人影響的,還是堅定不移的?
堅定不移卦...
30.會因為自己的妄想而對原作產生罪惡感嗎?
絕對唔會,可以嘅話,原作者偶爾都腐吓少少都唔錯喎
31.對於BL以外的男女CP有什麼想法?
本來就睇看男女CP先架啦
32.你是屬於逆王道,還是王道路線呢?
王道,逆王道都係因應個人喜好而定
33.現在在你心中最熱愛的種類是?(ex:動畫,少年漫畫,少女漫畫,藝能...)
好看就愛看
34.你會迷上那個種類的因緣是?
因為好看
35.在那個種類裡你喜歡的CP有?
要睇吓係咩喇,唔係每套作品都可以聯想倒CP出黎架
36.你有創作過任何同人作品嗎?
有
37.有的話→你是屬於寫文章的?還是畫圖的?
畫圖
38.在你電腦裡所登錄在"我的最愛"裡的同人系網站的數量?
多到數不清
39.你週遭的親人或朋友知道你是同人女嗎?
知
40.如果你的兄弟跟你說他是同性戀,你會?
鐘意就好
41.身邊有同人女同伴嗎?
有
42.順帶一提,你有參加同人社團嗎?
有
43.沒有的人→今後有參加的打算嗎?

44.有COSPLAY過嗎?是COS誰?
TERU,華月,GACKT
45.對於台灣把同人誌跟COSPLAY搞混在一起有什麼想法?
由他吧,與我無關
46.一年大概參加幾次販售會?
一次
47.總共收藏幾本同人誌?
想數都唔得,我啲同人堆太亂
48.你所買的同人誌中,漫畫跟小說,哪一種比較多?
清一色漫畫
49.對了,你知道BL,耽美,???還有GAY之間的差別嗎?
冇刻意去分喎
50.辛苦你了,已經到一半了喔~!接下來是比較麻煩的質問,做好心理準備了嗎?

那麼,繼續吧!!

51.你喜歡的故事類型有?(ex:悲戀,砂糖,單戀,純愛....)
冇特定
52.相反的.無論如何都無法接受的故事類型?
唔make sense,難頂嘅
53.喜歡的時代背景設定?(ex:日本戰國時代.三國時代,中世紀歐洲...)
只要寫得好,什麼都鐘意
54.喜歡的場景設定?(ex:學園,辦公室,醫院....)
同上
55.對於平行世界,假想設定有什麼想法?(ex:歷史人物生活在現代...)
超喜歡
56.對於喪失記憶,前世今生,妖魔,死亡,童話,男娼...之類的老套劇情,有興趣嗎?
乜好老套咩???
57.承上,其實曾經有寫過,或者今後想要寫?
有妄想過
58.可以接受藝人,電視電影,或歷史等的真人同人嗎?
可以
59.有喜歡的藝人同人嗎?有的話請推薦自己喜歡的CP
Sakura x Hyde
60.有喜歡的影視同人嗎?有的話請推薦自己喜歡的CP
Aragon x Legolas
61.有喜歡的歷史同人嗎?有的話請推薦自己喜歡的CP
甘寧x凌統
62.可以接受在同人創作裡加入自創角色的作品嗎?
可以
63.可以接受男人跟男人結婚,甚至生小孩的故事嗎?
可以
64.對於女裝題材甚至女體化有什麼想法?
女裝ok , 女體化...不如睇男女CP
65.對於幼兒化題材有什麼想法?
我鐘意兩小無猜嗰類故事,但唔好有H
66.對於交換人格的題材有什麼想法?
鐘意呀,甚至係交換身體我都鐘意
67.對於正太跟蘿莉有什麼想法
好少留意,冇意見
68.認為幾歲以下稱為正太?幾歲以下為少年?幾歲以上為大叔?
睇樣而定,因各人畫風唔同,不可作準
69.貓耳少年,天使少年....會萌嗎?
要睇吓係邊個喇,唔係個個貓倒耳,天倒使,唔襯就核突架喇
70.能接受攻受倒換嗎?
有啲可以,但有啲係王道不可逆
71.你覺得最能代表BL的歌曲是?(中英日不拘
禁色 (達明一派)
72.對沒有性別,或是雌雄同體有什麼看法?
飛鳥了
73.以下為18禁問題....未成年或無法回答的請跳過

74.不多說!對於18禁有什麼想法?
十咩野八禁oY,就算係廿八禁三十八禁d未夠"稱"嘅都會睇架啦
75.喜歡含蓄一點的說法還是露骨一點的說法?(ex:陰莖跟分身,乳頭跟果實...)(我在寫什麼...Orz)
你喜歡我說話文皺皺的還是粗話?!+++(ex:頂倒您的肺部或頂你個臭肺...)(我在說什麼...Orz)
76.H鏡頭,你大概可以忍受到什麼程度的描寫?
要睇吓劇情係咪須要
77.對於在除了床以外的場所H,有什麼想法?
冇問題,咩地方都冇問題!!
78.喜歡哪種H姿勢?(ex:69式,修道士式...)
只要MOE就得
79.可以接受SM,小道具,強姦,輪姦,暴力,監禁....等等"鬼畜"的類型嗎?
要睇吓劇情係咪須要
80.OK!18禁話題結束了~辛苦你了!接下來是選擇題(笑)

81.美型,性格惡劣的女王受跟坦率,天真無邪的受,比較喜歡哪一種?
前者
82.容姿端正,頭腦聰明但冷酷無情的攻君以及溫柔體貼,有點沒用,凡事以小受為中心的攻君,比較喜歡哪一種?
兩邊都好喎......咁...前者啦
83.對你而言,小叮噹跟大雄,誰是攻誰是受?
九唔搭八
84.對你而言,大野跟杉山((c)櫻桃小丸子),誰是攻誰是受?
冇睇過小丸子,唔知邊個打邊個
85.哥哥跟弟弟,你比較喜歡哪一方攻,哪一方受?
比較就.....弟弟攻哥哥受啦
86.年上攻跟年下攻,一定要選的話,比較喜歡哪一個?
兩邊都鐘意喎...咁我穩震啲揀年上攻啦,若果係少年x大叔呢類年下攻我唔係好moe
87.攻君較強勢以及受君較強勢,比較喜歡哪一種?
咁難揀架!我鐘意強攻強受架,一定要揀,就只好強攻較強勢啦...
88.原本就是同性戀,跟只是因為喜歡的人剛好是男的,比較喜歡哪一種?
一定要揀嘅話,就後者囉...
89.HAPPY END跟BAD END,比較喜歡哪一方?
HAPPY ENDING
90.請以攻君的身分,對小受說出最深情的告白
你是我的
91.請以受君的身分,對攻君說出最深情的告白
>////<
92.請為自己喜歡的配對選出最合適的歌曲
天生一對(夢劇院)
93.最喜歡的男性身體部位是?
面相,身型
94.偷偷問一下....可以接受GL(女女)嗎?
比較少接觸,正所謂同性相拒異性相吸架嘛
95.加油!再一下就結束了~~有沒有話想跟質問作者說的?
你好煩+++++++++++
96.目前為止,最難回答的題目是?
選擇題,問親都係兩者都鐘意的,好難決擇
97.目前為止,最令你印象深刻的題目是?
冇喎,不過扣埋嗰啲唔係問人嘅問題,得九十幾題唔係一百問黎喎
98.你的同人女度有多少呢?
百份百
99.有想過總有一天要脫離這個圈子嗎?
隨遇而安,順其自然
100.辛苦你了,最後請認真回答,BL同人對你的意義是?
好物

LIVE OF MY LIFE

2006-02-08T22:26:00.000-08:00

我有本九九年嘅AIA記事簿一直都袋响身,入面乜都有,
有字,有圖(自己嘅,人哋畫嘅),有搵工地址,訂書資料等等...
由於入面有成六七年嘅嘢,即使係殘晒,都冇諗過要掉,
同時入面夾住咗我一半以前睇過既concert飛,
平時睇戲我係唔會keep飛,但係睇concert就會keep,
因為有d concert飛設計得幾靚,所以就開始會草concert飛,
不過而家d concert好多都係快達票賣飛,而家d飛唔靚喇....
一次過睇返d飛,原來睇過嘅concert都唔少,
由第一張草嘅飛計起,
1997-3-10 Suede live in HK (伊館)
第一次睇嘅外國band show,仲認識咗坐前排嘅音樂好友Damon同Ginnie,Good Show~~
1997-3-11 Suede live in HK (HITEC)
反應好加場,第一次睇嘅all standing show,雖然辛苦,但睇live企好過坐架
1997-6-28 UNITY (HITEC)
回歸show,有Boy George, Gene.....
1997-7-18 Silver Sun live '97 (執咗嘅Hot Gossip)
1998-1-30 Prodigy live in HK (HITEC)
1998-2-22 OASIS Be Here Now World Tour Live in HK (會展)
好多人...响前面唔係响第一行太辛苦,去返面舒服地睇
1998-3-30 Ocean Colour Scene in Concert (高山)
1998-9-23 PUFFY Jet Tour '98 in HK (HITEC)
1998-11-7 HEINEKEN MUSIC HORIZONS '98 (紅館)
有Julian Lennon,仲有邊個...唔記得咗...
1999-1-11 MANSUN live in HK (HITEC)
可以近距離接觸,好難忘!
1999(張飛冇寫幾時) Rialto acoustic party (藝穗會)
同場見倒黃耀明都去睇show
1999-9-28 Suede live Asian tour 1999 (會展)
第三度來港開concert,迫爆玻璃
2000-8-7 光天化日黃耀明演唱會 (會展)
第一次睇明哥concert,正!又夠閃!
2000-7-27 Primal Scream live in Concert (香港展覽中心)
2000-10-25 TOKIO concert tour 2000 in HK
同Nell遲咗半粒鐘先入場,之前仲好姿遊咁慢慢食飯...第一次現場睇Johnny's旗下嘅live,都幾新鮮
2000-10-27 Paul Gilbert live 2000 HK (高山)
開show前一日先至決定買飛睇,值得睇!
2000-11-11 Luna Sea concert tour 2000
好記得小殘帶埋Banner去,仲交埋比佢地,好呀!
2001-5-18 Dragon Ash live in HK (HITEC)
YOU拆天地叫ばば(馬場)
2001-11-7 Coming Century HK 2001
V6 後生嗰三個,多得京嘅帶脅!
2001-12-30 SPACE ODYSSEY (HITEC)
元旦party, 有Darren Emerson
2002-1-20 Jamiroquai A Fuck Odyssey (會展)
睇得好開心嘅live
2002-7-31 Pet Shop Boys live in HK (會展)
睇完live要返返公司開夜,西客呀,乜慶都掃晒...
2002-8-14 Summer Sonic 2002 live in HK (會展)
又係多得京嘅帶脅,可以睇倒Guns n Roses,仲有Inoran!
2002-8-15 Cranberries & No Doubt live in HK (會展)
勁抵! 一個live可睇倒兩隊band!
2003-1-20 Suede Asia tour 2003 (伊館)
第四度來港開show
2003-11-1 now.com黃耀明03 (紅館)
2004-2-28 Barbara Morgenstern and Maximilian Hecker on a world tour with the Goethe-Institut Live in HK (結業前一日嘅Queen's Bar)
友人介紹去睇來自柏林嘅兩位歌手,唔錯!果晚同Damoon,Ginnie,Irene,Roni睇得好開心!
2004-3-10 Placebo live in HK (HITEC)
2004-12-9 達明一派為人民服務演唱會 (紅館)
2005-8-27 向海峰狂呼 (馬鞍山白石俱樂部)
得到Damon嘅帶脅
2005-8-18 Here Come the TEARS live in HK (會展)
終於睇倒Bernard Butler,不過已經唔係Suede...
2005-10-19 林海峰發花癲 (伊館)
第一次睇棟篤笑,林海峰好得!
2005-10-20 草蜢我們的演唱會 (紅館)
我年代, 下次加場嘅話睇四百!!
2005-10-22 草蜢林狗我們一起發花癲 (紅館)
見反應好就加場crossover,又係多得Damon嘅帶脅

仲有張飛係Starsailor live in HK,我記得張飛好似係成張被收咗,
好衰! 冇得比人草,Starsailor嗰場好好睇,出到黎個個都一致讚好!
另外有張飛係冇標年份,Postishead live in HK,可惜當時佢哋臨開
show前一個禮拜度取消咗場live,無緣睇Postishead...
黎緊二月會去睇Franz Ferdinand(友人叫佢做"費迪南",好笑!)同
埋第二度來港嘅OASIS,多d黎港開concert啦!雖然荷包搾盡,但無
任歡迎呀~

LIVE 8

2006-02-08T18:16:00.000-08:00

早前新年假上咗大陸旅行三日,返黎响深圳解散,
去到深圳,就少不免買吓老翻,d老翻碟平都不特只,
仲要係雙CD,有埋個歌手嘅舊歌,
就好似買咗隻新album加greatest hits咁,
我以前好鐘意買碟,每個月都會買十隻八隻,
不過而家冇咗渠道,接觸唔倒新或舊嘅音樂,
而且家吓老翻download當道,以前我係謝絕買老翻嘅,
而家都會download歌,不過老翻碟就極少買,
上次去深圳見d碟又平又多歌,實在忍唔住手買咗三隻碟...
另外又買咗Live 8嘅DVD,呢隻四碟DVD,一直都好想睇,
早輪電視有播過,不過由於冇乜睇電視,都唔醒起去睇,
到出咗DVD,因為係四碟DVD,正版價錢就相對貴,料
我唔捨得買呀! 所以唯有買老翻啦!
基本上佢都係跟足正版咁嘅包裝黎照翻,
老翻黎講,都算係精美架喇!
因為四碟共十個鐘,我暫時只睇咗第一隻碟,同埋back stage嘅花絮,
我一黎就開花絮黎睇(通常都係鐘意睇d台後嘅嘢),
因為我一向都好鐘意睇d外國明歌星,好似奧斯卡呀,音樂頒獎典禮...等等,
睇住台後除咗歌手,仲有演員,球員,名人...等响台後soical,
有明星睇,緊係睇得開心啦!
而隻碟有好多唔同嘅歌手,樂隊為慈善做show,好多都啱睇,唔錯!
一向都好鐘意睇d crossover表演,一出場,
就係Paul McCartney x U2大唱Sgt. Pepper's Lonely Hearts Club Band,
本來就好鐘意呢首歌,而家有兩個大阿哥級嘅黎合作演繹,都好夾喎!
跟住仲有驚喜位,Coldplay表演完之後,介紹Richard Ashcroft出場,
諗住佢都係唱佢自己嘅solo歌啦!
結果原來佢自己歌唔唱(唔通怕佢自己d歌唔夠hit,怕d樂迷冇反應?!),
竟然係唱the verve時期嘅大hit歌Bittersweet Symphony!!!
一聽咁搶耳又易認嘅前奏就好興奮(而且又好耐冇聽,特別興奮!),
好開心佢唔唱自己歌唱the verve嘅歌, 但係,
响背後,為Richard Ashcroft彈奏Bittersweet Symphony嘅,
係仲未走嘅Coldplay,而主音Chris Martin,佢彈住鋼琴,
為Richard Ashcroft和音,邊彈邊唱,咁嘅編排真係唔錯!
呢類crossover,通常都係呢類群星合演show之類場合,
又或者係d合唱作先有得睇,
平時download歌search歌,一見有啱嘅crossover歌,
都會好有興趣去聽,一首歌由兩位,幾位甚至十幾位歌手,
合作演繹,感覺新鮮,夾嘅話,真係又好聽又好睇!

續。自訂八葉

2006-01-23T17:19:00.000-08:00

繼續之前講過嘅自訂八葉，跟住輪到我哋一路都咁喜愛嘅三國無雙喇！
無雙入面有成四十幾個角色咁多，首先為免我哋揀得太辛苦，先從各國入面揀幾個最鐘意既出黎,
我提名咗自己友孔明，諗住話”燦”佢啦！
可惜佢都係敵唔過其他型男美男靚男，而且又得八個位，十大季選就有佢份，
雖然好似好衰自己友都唔揀，但選擇太多，又太花（指我個人...)
除非比個eye shadow孔明我，我就第一時間揀佢呀！！！

口水噴完，三國無雙八葉如下：
甘寧
凌統
周泰
夏侯惇
張遼
張郃(呢個更正咗,我都係鐘意美しい多啲!)
趙雲
馬超

之後仲講埋戰國無雙八葉，不過第一集角色比較少，太易揀倒八個出黎，
等第二集出，加埋新角色先至再揀過

自訂八葉

2006-01-17T22:51:00.000-08:00

上星期四(一月十二日)，去P家畫稿，我和京邊畫邊閒話家常，
當P正在玩遙時3時，我們忽然間想到不如每人說自己的自訂八葉，
候選人有很多,包括清盛，時朝等等...我是最快選出自訂八葉的，
我的自訂八葉如下：
白龍
源九郎義経
平經正
梶原景時
リズヴァーン
藤原泰衡
有川讓
有川將臣

玩完遙時自訂八葉，還有三國無雙和戰國無雙八葉，
更開玩笑地說自訂聲優八葉(可惜我數不倒)，很好玩～～

MEMORIES OF GEISHA

2006-01-17T22:28:00.000-08:00

昨天(一月十七日)看了藝伎回憶錄(Memories of Geisha)，
覺得頗好看的，演員也稱職，戲服和化妝都很漂亮，
那個二次大戰時的日本街景我很喜歡，不知是否搭建，
就算是，可以在那裡逛逛就好了！
不過此片全英語對白(只有幾句日文)，很怪，非常怪！
看此片時，又令我幻想著樂而忘返團...

HARRY POTTER AND THE GOBLET OF FIRE

2006-01-08T06:30:00.000-08:00

以後我會盡量多寫東東...(希望...b)

最近都沒什麼值得記下的事,就說舊年的事吧!
舊年聖誕節(其實只是兩三個禮拜之前...),買了harry potter的soundtrack,
怪了! 我為何要買harry potter的soundtrack?
本身,我並不是harry potter迷,我只會看電影,文盲的我是不會看小說的,
也從不會買有關harry potter的東西,
為的,只是soundtrack內收錄的三首歌而已...
在十二月十八日,看了優先場,沒什麼特別的感想,
可能不是很迷harry potter,因此覺得每集都是差不多,
但這一集的harry potter,有驚喜!!!(對我來說)
內裡有場舞會的戲,台上有隊為舞會表演的樂隊,
唱主音的,竟然是JARVIS COCKER!!!!!
就只有這麼一個鏡頭,我和我的友人DAMON立即互相對望,然後笑了出聲,
完場後出來時,我和DAMON都很興奮的談論著,
然之後,過了一個星期,就買了SOUNDTRACK了...
細看SOUNDTRACK內容,原來還有PULP的結他手STEVE MACKEY,
更令人意想不到的是,竟有RADIOHEAD的結他手JONNY GREENWOOD!!!
當我聽這三首歌的時候,真是令人久違而又懷念的聲音,
令人懷念JARVIS COCKER那獨特的唱腔,歌曲也很好聽!
不過實在想不到這三首歌是收錄在HARRY POTTER的SOUNDTRACK...
我很喜歡看電影,雖不是發燒友,但看電影是我的愛好之一,
我很喜歡聽音樂,雖也不是發燒友,但聽音樂也是我的愛好之一,
每當看一齣電影,內有音樂人客串時,我都會看得格外高興,
像CONSTANTINE的GAVIN ROSSDALE,
THE AVIATOR的GWEN STEFANI等等...(我竟一想就想起他們兩夫婦)
即使只有點點的戲份,看到音樂人出現在銀幕上,
不知怎的,就是會很高興,可能是,我愛電影和音樂!!!

ワシ大好き塊魂！

2006-01-06T09:16:00.001-08:00

前幾天看見game舖廚櫃有塊魂PSP專用王子袋,一看見便衝埋去貼住玻璃看,
實在太太太可愛了~~~當堂發出otaku的怪叫,不過我沒有去問價錢,因為我沒有PSP嘛...
回到家,便跟我妹說有王子袋的事,憑我的形容,妹的想像力,她也感到王子袋很漂亮,
便說叫我買,一百元也可以,可以用來做化妝袋,我也覺得不錯,便有興趣想買王子袋,
不過第二天我告訴也是喜歡塊魂的友人P王子袋的事,她也很感興趣,
可是原來王子袋是要連game買的,不可以分拆賣,P早已買了game,沒可能再買多一隻...
本來,我是沒想過買PSP,可是當某日去CHAM家作樂時,P帶來了剛買來的塊魂,
便很感興趣地問她拿來玩,原來是跟PS2版是不同的,畫而又好漂亮,又可愛,
雖然不習慣PSP的制,可是它的可愛度是可以掩蓋手制的不足,我想我是陷落了......
我開始有了想買PSP塊魂的念頭,幾天後再給我看見王子袋,實在令人抵擋不了~~~
我還在爭扎中......我不太想為了一隻GAME而買部PSP機呢......HELP~~~LEON~~~

6/1/06 1:34am

2006-01-05T09:31:00.000-08:00

開張大吉(無聊)