翡冷翠

今集嘅"向世界出發"係講意大利嘅佛羅倫斯,片中所及嘅地方我大部份都有去過,睇嗰陣時好有親切感,尤其係喺米高安哲羅廣場上表演嘅Jazz樂隊,我當時都有偷拍佢地(偷拍已變咗明拍,被佢哋發現咗,不過佢哋出得黎表演嘅都慣咗比人影相),如今喺電視上又見倒,當堂好興奮咁同我妹講「我見過呢幾個人呀!」「我嗰陣影咗佢哋相呀!」想必呢隊樂隊經常喺米高安哲羅廣場表演。當時同我一齊旅行嘅家姐都即時打電話比我,一齊講佛羅倫斯。記返起當時去米高安哲羅廣場,係我堅持一定要去,即使一路喘氣行上去(廣場係喺小山丘上),我家姐一路埋怨我安排失當,去唔倒比薩斜塔,我都堅持要去米高安哲羅廣場,"虎陷"佛羅倫斯市。意大利行我只去咗幾個城市,呢幾個城市我都好鐘意,尤其係佛羅倫斯,我對佛羅倫斯好有感覺,希望將來有機會可以重臨佛羅倫斯。下集預告胡杏兒食嘅牛肚包我都有試過,牛肚好食,淨係牛肚會好食啲,夾面包冇咁match。我記得我嗰時買牛肚包,叫埋咖啡,收錢嘅老闆娘問我係咪食牛肚包,我話係,老闆娘就叫我唔好飲咖啡,飲可樂啦!好,你話點就點啦!